१० थर लावणाऱ्या गोविंदा पथकास ११ लाखांचे पारितोषिक
गोविंदा पथकासाठी अन्नछत्राची उभारणी
मुख्यमंत्री देवेंद्र फडणवीस, उपमुख्यमंत्री एकनाथ शिंदे यांची उपस्थिती
ठाणे :- भारतीय जनता पार्टी ठाणे शहर (जिल्हा) व शारदा संकल्प प्रतिष्ठान, ठाणे यांच्या संयुक्त विद्यमाने प्रतिवर्षी प्रमाणे यंदाही १६ ऑगस्ट रोजी कॅसल मिल नाका येथील स्व. मीनाताई ठाकरे चौक येथे गोकुळ दहीहंडी उत्सवाचे आयोजन केले असल्याची माहिती आज एका पत्रकार परिषदेत आयोजक माजी नगरसेवक कृष्णा पाटील यांनी दिली.
पत्रकार परिषदेस भारतीय जनता पार्टी ठाणे शहर (जिल्हा) अध्यक्ष संदीप लेले, माजी नगरसेविका नंदा कृष्णा पाटील, भारतीय जनता पार्टी ठाणे शहर (जिल्हा) सरचिटणीस तथा शारदा संकल्प प्रतिष्ठानचे कार्याध्यक्ष सचिन पाटील व्यासपीठावर उपस्थित होते.
गतवर्षी ठाण्यातील खोपटाचा राजा गोविंदा पथकाने आमच्या येथे नऊ थर लावून विश्वविक्रम केला आहे. आमची दहीहंडी `गोकुळ दहीहंडी’ म्हणून संपूर्ण महाराष्ट्रात नावारूपाला आली आहे. मुख्यमंत्री देवेंद्र फडणवीस, उपमुख्यमंत्री एकनाथ शिंदे यांच्या सह भाजपचे जेष्ठ नेते, मंत्री, आमदार, खासदार, कलाकार या उत्सवात सहभागी होणार आहेत. मागील वर्षी २०० गोविंदा पथकांची उपस्थिती उत्सवाला लाभली होती. यंदा है आकडा वाढून २५० गोविंदा पथक येथे येण्याची शक्यता आहे. दमलेल्या गोविंदा पथकासाठी अन्नछत्र उभारण्यात येणार आहे. गेल्या वर्षी १२ हजार गोविंदानी या अन्नछत्राचा लाभ घेतला. तर या वर्षी १५ ते २० हजार गोविंदा येण्याची शक्यता असल्याने तशी व्यवस्था आम्ही करणार आहोत. कोणाला दुखापत होऊ नये यासाठी आम्ही सर्वोतोपारी काळजी घेत असल्याची माहिती कृष्णा पाटील यांनी दिली.
प्रथम १० थर लावणाऱ्या पुरुष गोविंदा पथकास ११ लाख ११ हजार १११ रुपये व चषक, प्रथम ९ थर लावणाऱ्या पथकास ५ लाख ५५ हजार ५५५ रुपये व चषक, नंतरचे नऊ थर लावणाऱ्या पथकास २ लाख २२ हजार २२२ रुपये व चषक, ८ थरासाठी ५१,००० रुपये व चषक, ७ थरासाठी १५,००० रुपये व चषक, ६ थरासाठी ९,००० रुपये व चषक, ५ थरासाठी ५,००० रुपये व चषक, ४ थरासाठी ५,००० रुपये व चषक असे बक्षिस असणार आहे. प्रथम ७ थर लावणाऱ्या महिला गोविंदा पथकास १ लाख ५१ हजार १११ रुपये व चषक, नंतरचे ७ थर लावणाऱ्या पथकास ५१ हजार रुपये व चषक, ६ थर लावणाऱ्या पथकास २५ हजार रुपये व चषक, ५ थर लावणाऱ्या पथकास १० हजार रुपये व चषक, ४ थर लावणाऱ्या पथकास ५ हजार रुपये व चषक असे बक्षिसाचे स्वरूप असल्याची माहिती कृष्णा पाटील यांनी दिली.
