ठाणे :- ज्येष्ठ कवी व ज्ञानपीठ पुरस्कार प्राप्त वि. वा. शिरवाडकर उर्फ कुसुमाग्रज यांच्या जयंतीच्या निमित्ताने ठाणे महानगरपालिकेतर्फे मुख्यालयात मराठी भाषा गौरव दिन साजरा करण्यात आला.
महापालिका मुख्यालयातील भारतरत्न डॉ. बाबासाहेब आंबेडकर सभागृहासमोर असलेल्या कुसुमाग्रज यांच्या ‘स्वातंत्र्यदेवीची विनवणी’ या कवितेचे वाचन याप्रसंगी करण्यात आले. या कवितेचे अक्षरसुलेखन ज्येष्ठ सुलेखनकार अच्युत पालव यांनी केले आहे.
कार्यक्रमाच्या सुरूवातीला ज्येष्ठ कवी, गझलकार सुरेश भट यांच्या लेखणीतून उतरलेल्या ‘लाभले आम्हास भाग्य बोलतो मराठी’ या गाण्याच्या सुरावटींनी वातावरण मराठीमय झाले. कुसुमाग्रज यांचे त्यांच्या जयंतीदिनी स्मरण करून ‘स्वातंत्र्यदेवीची विनवणी’ या कवितेचे वाचन करण्यात आले. त्यावेळी, ठाणे महापालिका आयुक्त सौरभ राव, अतिरिक्त आयुक्त प्रशांत रोडे, उपायुक्त उमेश बिरारी, विधी अधिकारी मकरंद काळे, महिला व बालविकास अधिकारी दयानंद गुंडप, माहिती व जनसंपर्क अधिकारी रवींद्र मांजरेकर आदी उपस्थित होते.
मराठी वाचन कट्टा
मराठी भाषा गौरव दिनाच्या निमित्ताने ठाणे महानगरपालिकेच्या संकेतस्थळावर (वेबसाईट- https://thanecity.gov.in/) मराठी वाचन कट्टा सुरू करण्यात आला आहे. या कट्ट्याच्या दुव्यावरून मराठी विश्वकोशाच्या संकेतस्थळावर जाता येते. मराठी विश्वकोशाच्या संकेतस्थळावर मराठी विश्वकोशातील नोंदी, कुमार विश्वकोशातील नोंदी वाचता येतात. मराठी भाषा प्रेमी आणि अभ्यासकांसाठी हा दुवा अतिशय मोलाचा आहे.
