दिवा:- राज्य शासनाने पहिली ते चौथी हिंदी सक्तीचा निर्णय रद्द केल्यानंतरही दिव्यातील एका शाळेने तिसरीच्या वर्गाचा हिंदीचा पेपर घेतल्याची माहिती दिवा मनसेच्या पदाधिकाऱ्यांना मिळाली होती. याबाबत मनसेने शाळा व्यवस्थापनाला जाब विचारताच संबंधित शाळेने हिंदीचा पेपर रद्द केला असल्याची माहिती दिवा मनसेने दिली.
दिव्यातील कुबेरेश्वर महादेव इंग्लिश स्कूल या शाळेत आज ३ री च्या विद्यार्थ्यांचा हिंदी भाषेचा पेपर असल्याची माहिती मनसेचे शहर सचिव प्रशांत गावडे यांना मिळाली. याबाबत खातरजमा केल्यानंतर मनसेच्या पदाधिकाऱ्यांनी शाळेवर धडक देऊन शाळा व्यवस्थापनाला जाब विचारला.
इयत्ता १ ली ते ४ थी पर्यंतच्या विद्यार्थ्यांना हिंदी शिकवण्याच्या निर्णय शासनाने रद्द केलेला असतानाही अशा प्रकारच्या कुठल्याही शासन निर्णयाची माहितीच नसल्याचे धक्कादायक विधान शाळा व्यवस्थापकांनी केले आहे. दिव्यातील शाळांमध्ये हिंदी भाषा शिकवली जात असल्याबाबतचे पत्र बुधवारी मनसे नेते अविनाश जाधव आणि शहर अध्यक्ष तुषार पाटील यांच्या नेतृत्वाखालील शिष्टमंडळाने शिक्षण अधिकाऱ्यांना दिले होते. अशा शाळांवर कारवाई करण्याची मागणी देखील करण्यात आली होती.
मनसेच्या विरोधा नंतर संबंधित शाळेने १ली ते ४थी पर्यंतची हिंदी विषयाची परीक्षा तात्काळ स्थगित केली असून भविष्यात अशा प्रकारे कुठलीही कृती करणार नाही अशी लेखी हमी शाळेने दिवा मनसेला दिली आहे. यावेळी महाराष्ट्र नवनिर्माण सेनेचे दिवा शहर सचिव प्रशांत गावडे, विभाग अध्यक्ष शरद पाटील, उपविभाग अध्यक्ष सुशांत पोस्टतांडेल, शाखाध्यक्ष सागर निकम, धनेश पाटील, महादेव पाटील आणि इतर पदाधिकारी उपस्थित होते.
