ठाणे: ठाणे जिल्हा कबड्डी असोसिएशन आणि ॲडव्होकेट सौ. पूजा राजा ठाकूर यांच्या सहकार्याने आयोजित ‘ठाणे जिल्हा अजिंक्यपद निवड चाचणी – खासदार चषक’ कबड्डी स्पर्धेत चुरशीचे सामने पाहायला मिळत आहेत. कळवा, खारेगाव येथील खारलँड मैदानावर सुरू असलेल्या या स्पर्धेत उजाळा मंडळ, जय बजरंग-खारेगाव, जॉयकुमार आणि श्री समर्थ या संघांनी आपापल्या प्रतिस्पर्ध्यांना नमवत चौथी फेरी गाठली आहे. विशेष म्हणजे, श्री विठ्ठल मंडळाने ५-५ चढायांच्या अटीतटीच्या डावात विजय मिळवत दिमाखात आगेकूच केली.
श्री विठ्ठल मंडळाचा थरारक विजय
प्रथम श्रेणी पुरुष गटात श्री विठ्ठल मंडळ आणि डॉन बॉस्को स्पोर्टस् यांच्यात काटाजोड लढत झाली. मध्यंतराला १३-१५ अशा दोन गुणांनी पिछाडीवर असलेल्या श्री विठ्ठल मंडळाने पूर्ण डावात ३०-३० अशी बरोबरी साधली. सामन्याचा निकाल लावण्यासाठी झालेल्या ५-५ चढायांच्या जादा डावात श्री विठ्ठलने ३७-३४ (जादा डावात ७-४) असा विजय मिळवला. योगेश जाधवने दोन गडी टिपत विजयात मोलाची भूमिका बजावली, त्याला चिन्मय गुरव, अक्षय मकवाना आणि पकडीत चेतन मलिक, अक्षय गुरव यांची उत्तम साथ लाभली. डॉन बॉस्कोच्या आकाश गुप्ता आणि जीत सिंग यांचा खेळ जादा डावात अपयशी ठरला.
उजाळा आणि जय बजरंगची यशस्वी वाटचाल
उजाळा मंडळ: नव तरुण मंडळाविरुद्ध पूर्वार्धात १२-१८ अशा पिछाडीवर असलेल्या उजाळा मंडळाने उत्तरार्धात जोरदार पुनरागमन करत ४३-३१ असा विजय मिळवला. मिहीर पाटील आणि सुमित पाटील यांच्या झंझावाती चढायांनी सामन्याचे चित्र पालटले.
जय बजरंग (खारेगाव): आर्यन पाटील आणि सोहम मोरे यांच्या अष्टपैलू खेळामुळे जय बजरंग संघाने श्री समर्थ मंडळाचा २६-२२ असा पराभव केला.
जॉयकुमार स्पोर्टस्: अत्यंत चुरशीच्या सामन्यात जॉयकुमारने श्री मावळी मंडळावर २३-२२ अशी अवघ्या एका गुणाने मात केली. पियुष तिवारी आणि जितेश चौधरी विजयाचे मानकरी ठरले.
इतर निकालांचा आढावा
दुसऱ्या बाजूला, श्री समर्थने स्व. रतन पाटील संघाला ३०-२६ ने हरवले, तर आत्माराम मंडळाने स्व. आकाश मंडळाचा २६-२१ असा पराभव केला.
इतर संक्षिप्त निकाल:
विजय मंडळ वि.वि. श्री हनुमान (३७-३०)
ओम् वर्तकनगर वि.वि. जय खामदेश्वर (३९-३०)
जय बजरंग (वाशिंद) वि.वि. नवरत्न (४४-१९)
शिवशंकर वि.वि. ग्रीफिन्स जिम. ‘ब’ (३६-०७)
कळवा-खारेगाव परिसरातील कबड्डी शौकीनांनी या सामन्यांचा आनंद घेण्यासाठी मोठी गर्दी केली आहे.
