“आमचा आक्रोश जसा ऐकला तसाच न्याय करा”
ठाणे :- राबोडी येथील सामाजिक कार्यकर्ते जमील शेख हत्याकांडाचा फेर तपास करण्याचे आदेश मुख्यमंत्री देवेंद्र फडणवीस यांनी दिले आहेत. हा विषय डाॅ.जितेंद्र आव्हाड यांनी अधिवेशनात मांडला होता. त्यामुळेच फेर तपास प्रक्रिया सुरू झाली आहे. त्याबद्दल जमील शेख यांच्या मुली जोबिया आणि जायरा यांनी डाॅ.जितेंद्र आव्हाड यांची निवासस्थानी भेट घेऊन आभार व्यक्त केले. डाॅ.जितेंद्र आव्हाड हे आमच्यासाठी लढत असल्यानेच न्याय दृष्टीपथात आला आहे, असे या मुलींनी सांगितले. तसेच, मुख्यमंत्री देवेंद्र फडणवीस यांना पत्र लिहून ऋणनिर्देश व्यक्त केले आहेत. डाॅ.जितेंद्र आव्हाड यांच्याकडेच त्यांनी हे पत्र सोपविले असून मुख्यमंत्र्यांची भेट घेऊन त्यांना हे आभारपत्र द्यावे, अशी विनंती केली आहे.
डाॅ.जितेंद्र आव्हाड यांची भेट घेतल्यानंतर जोबिया आणि जायरा यांनी सांगितले की, डाॅ.जितेंद्र आव्हाड यांनी विधानसभेत आम्हाला न्याय देण्यासाठी संघर्ष केला. त्यामुळेच मुख्यमंत्र्यांनी दिनांक १८ जुलै, २०२५ रोजी विधानसभेत केलेल्या भाषणात जमील शेख यांच्या हत्येचा फेरतपास करण्याची घोषणा केली. तसेच, शेख कुटुंबाला न्याय देण्यास आपण बांधील असून योग्य तपास करून फडणवीस यांनी न्याय देऊ, असे भाष्य केले. त्याबद्दल आम्ही बहिणी आणि आमची आई त्यांचे आणि विषय पटलावर आणणारे डाॅ.जितेंद्र आव्हाड यांचे मनापासून आभार मानतो. आम्हाला लढण्याची प्रेरणा वैभवी संतोष देशमुख हिच्याकडून मिळाली आहे. मुख्यमंत्र्यांनी आमचा आक्रोश पाहून फेरतपासाचा निर्णय घेतला, त्याबद्दल आम्ही त्यांचे ऋणी आहोत, असे नमूद करून त्या म्हणाल्या की, नव्याने होणारी ही चौकशी आणि तपास हा चांगल्या अधिकाऱ्यांच्या हाती द्यावा, जेणेकरून ते कोणत्याही अमीषाला आणि कोणाच्याही दबावाला बळी पडणार नाहीत, याची काळजी घ्यावी. कारण पैसा आणि राजकीय दबाव हे बरेच काही करून जात असतात. आता ज्यांच्याकडे तपासकाम आहे, त्या दिलीप पाटील यांनी करोडो रूपये उकळलले आहेत. त्यांनी तपस भरकटवला आहे. तपासाधिकारी दिलीप पाटील अनेक पुराव्यांना बगल देऊन आरोपपत्रामध्ये आरोपींना साह्यभूत ठरणाऱ्या गोष्टी करून ठेवल्या आहेत, असेही वकील सांगत आहेत. पण, आमचा मुख्यमंत्र्यांवर विश्वास आहे. त्यामुळे न्याय करीत असताना योग्य त्या अधिकाऱ्यांच्या हाती तपासाची सूत्रे द्याल, याबद्दल आम्हाला खात्री आहे, असे म्हटले.
ये तो बस अंगडाई है, और लडाई बाकी है – डॉ . जितेंद्र आव्हाड
शेख कुटुंबीयांचा लढा विधिमंडळात लढल्याबद्दल जरा आणि जोबीया यांनी डॉ. जितेंद्र आव्हाड यांना पुष्पगुच्छ देण्याचा प्रयत्न केला. मात्र, ये तो बस अंगडाई है, और लडाई बाकी है , असे म्हणत डॉ. आव्हाड यांनी पुष्पगुच्छ कसले देताय, आपल्याला अजून खूप लढायचे आहे, असे सांगितले. ते म्हणाले की , जमील शेख हत्याकांडाचे प्रकरण खुले आहे. पण, मी १०० टक्के सांगतो की हा तपास पोलिसांनी योग्यरित्या केलाच नाही. सण 2014 मध्ये जमिलवर हल्ला झाला; त्यावेळी त्यानेच हल्ल्यामागे “आका” आहे, असे सांगितले होते. पण तेव्हाही कारवाई करण्यात आली नव्हती. खून होऊन पाच वर्षे झाली आहेत. पण, मुख्य आकाला अटक करण्यात आलेली नाही. मारेकरी इरफानने आकाचे नाव घेतले होते. ओसामानेही आकाचे नाव घेतले. ओसामाने ज्या बैदनाथ आणि देवेंद्र यांना पहिली सुपारी दिली होती. त्यांनीही आकाचे नाव घेतले आहे. शिवाय, ओसामाचा व्हिडिओदेखील आहे. मी देखील या कुटुंबाला पाच वर्षे मदत नाही; पण जमिलच्या मुलींकडे पाहिले, जमिलच्या पत्नीने रडत-रडत मला म्हटले की मला पैसे नको, मला न्याय हवाय. त्यांनतर मी हे प्रकरण विधानसभेत मांडले. मुख्यमंत्री फडणवीस हे आमचे वैचारिक विरोधी आहेत. पण, तेच न्याय देतील, याचा मलाही विश्वास होता.
या प्रकरणात आधीचे पोलीस अधिकारी ठाकरे यांनी चांगला तपास केला होता. पण, त्यांची बदली केली, बदलीचा स्टेटस आकाने ठेवला. जो कोणी योग्य तपास करेल, त्याची बदली केली जाईल, या धमकीसाठीच तो स्टेट्स होता. परिणामी, कोणाचीही चौकशी करण्याची हिमंत झाली नाही. आता आशा फक्त फडणवीस यांच्यावरच आहे. कारण त्यांनी मुलींच्या आक्रोशाचा उल्लेख केला आहे. त्यातून त्यांच्यातील पित्याची कळकळ दिसली आहे. तरीही, माझी मुख्यमंत्र्यांना विनंती आहे की, तपास एकाच्या हाती नको, तीन जणांची टीम असावी, असेही डॉ. आव्हाड म्हणाले.
